The Thavamani Times, Published on June 27,

திருவாரூர் | ஜூன் 27, 2026

தமிழ்நாடு யூனியன் ஆப் ஜர்னலிஸ்ட்ஸ் (Tamil Nadu Union of Journalists) சங்கத்தின் மாநிலத் தலைவரும், மார்க்சிஸ்ட் கம்யூனிஸ்ட் கட்சியின் மூத்த முன்னோடியுமான பி.எஸ்.டி. புருஷோத்தமன் இன்று (ஜூன் 27) திருவாரூர் அரசு மருத்துவக் கல்லூரி மருத்துவமனையில் சிகிச்சை பெற்று வந்த நிலையில் காலமானார். அவரது மறைவு பத்திரிகைத் துறையினரையும், இடதுசாரி இயக்கத்தினரையும் ஆழ்ந்த சோகத்தில் ஆழ்த்தியுள்ளது.

பல ஆண்டுகளாக பத்திரிகையாளர்களின் உரிமைகள், நலன், தொழில் பாதுகாப்பு மற்றும் கருத்துச் சுதந்திரத்திற்காக தொடர்ந்து குரல் கொடுத்து வந்தவர் பி.எஸ்.டி. புருஷோத்தமன். தமிழ்நாடு யூனியன் ஆப் ஜர்னலிஸ்ட்ஸ் சங்கத்தின் மாநிலத் தலைவராக பணியாற்றிய அவர், பத்திரிகையாளர்களின் பிரச்சினைகளை அரசு மற்றும் சம்பந்தப்பட்ட அதிகாரிகளின் கவனத்திற்கு கொண்டு சென்று தீர்வு காண பல்வேறு போராட்டங்கள் மற்றும் பேச்சுவார்த்தைகளில் முன்னிலை வகித்தார்.

மார்க்சிஸ்ட் கம்யூனிஸ்ட் கட்சியின் கொள்கை வழியில் உறுதியாக செயல்பட்ட அவர், பொதுமக்களின் உரிமைகள், சமூக நீதி மற்றும் ஜனநாயக மதிப்புகளை நிலைநாட்டும் பணியிலும் குறிப்பிடத்தக்க பங்களிப்பை வழங்கியவர். எளிமை, நேர்மை மற்றும் அர்ப்பணிப்பு ஆகியவற்றால் அனைவரின் மரியாதையையும் பெற்ற தலைவராக அறியப்பட்டார்.

அவரது மறைவு செய்தி வெளியானதைத் தொடர்ந்து பத்திரிகையாளர்கள், அரசியல் கட்சித் தலைவர்கள், சமூக அமைப்புகள் மற்றும் பல்வேறு தரப்பினரும் இரங்கல் தெரிவித்து வருகின்றனர். அவரது மறைவு பத்திரிகைத் துறைக்கும், தொழிற்சங்க இயக்கத்திற்கும் ஈடு செய்ய முடியாத இழப்பாகக் கருதப்படுகிறது.

"மார்க்சிஸ்ட் கம்யூனிஸ்ட் கட்சியின் நெறியில் பிறழாமல், பத்திரிகையாளர்களின் நலனுக்காகவே வாழ்நாள் முழுவதும் போராடிய அன்புத் தோழர் பி.எஸ்.டி. புருஷோத்தமனுக்கு செவ்வணக்கம்."